.. عيش انسان.. كلمات الشاعر/ عبدالرحيم علي
عيش انسان
__________
جربت تعيش انسان لو يوم
وتحس الام غلبان مطحون
جربت تعيش فى الكون مظلوم
وف صدرك قلب أسير مسجون
جربت تعيش هم المخاليق
وتنادى الدنيا ما تسأل فيك
جربت تحس بمعنى الضيق
ولا حد بقرش ابيض يحميك
جربت تحس بسجن براح
فيه طير بجناح مكسور وحزين
جربت تهيم فى الكون سواح
ولا تعرف باب السعد منين
جربت تحس أنك غرقان
ولا ايد تتمد عشان تنجيك
بتشاور تلقى الكون نعسان
والصاحى ما يسأل ابدا فيك
جربت تحس أنك عريان
مكسوف والناس ملايين حواليك
مكشوف للدنيا فى مية فدان
ولا واحد منهم هيغطيك
اصحى وإياك تتغر فى يوم
صحصح وارميها الدنيا وراك
وان جاك الهم عشان يلاقيك
اهرب وبسرعة من الشباك.
الدنيا غرورة بتلعب بيك
وتشوطك ولا بتسمٌى عليك
وانا وانت نصد بلاش تلهيك
وعنيك فتحها وصد بايديك
اياك تحسبها فى يوم بفلوس
ولا يوم تحسبها ازاى وبكام
الدنيا شعور وكلام محسوس
ونفوس بتحب تعيش فى سلام
ياما ناس بتحارب لاجل تعيش
ما تبيع كرامتها ولو بألوف
وناسات بتطاطى عشان بقشيش
وناسات بتطاطى قتلها الخوف
واهى دنيا تعيشها كريم فى امان
يا تعيش مكسور وذليل،وجبان
ايام بتعدى ما تعرف كام
وتموت مزلول،يا تموت انسان
شعر
عبد الرحيم على
تعليقات
إرسال تعليق