.. أزواج وزوجات في رمضان .. سجال بقلم د. سمير خليل و أ. صفاء الخواجة
🤣أزواج وزوجات في رمضان🤣
سجال بقلم الشاعر د. سمير خليل
والشاعرة. صفاء الخواجة
د. سمير
يِـنفع يا حبيبتي نقضِّـيها قُردِيحِى
أكْـلِة فُول أو عَـدس على أدِيـكِى
وبصَـلِـة المُحِـب خَروف يا عنيَّـه
تسْلَمِى ليَّه ... لِحَد ماقبَض ودِّيكِى
أ. صفاء
ينفع .. يانور العين
الكعك جاي متقولش منين
حضر لي يلا ومد ايديك
فرح عيالنا قرص و منين
د. سمير
الكعك جاي من باب الله
رزق جاني م اللي عطاه
هيَ الماهيه كفيانا المَـم
هَمْ ما يتْلَم ... وا أسفاه
أ. صفاء
عايزة افرح أهل البيت
واعمل كحكي بايدي يابيه
هو حرام نفرحوا بالنقشة
خلي توكالنا ياسيدي عليه
د. سمير
بس أنا خايف تتعبي نفسك
وأديكي غاليه عليٌَه وتعبك
إن كان ع النقشه دى سهله
بشوية حِنَّه ... تنقشي كفك
أ. صفاء
أنا مش عايزة النقشة بحنة
مُنقاش ينقش كحك بملبن
جوه الفرن لخبزه نسقف
طعمه بايدي ياناس بيجنن
د.سمير
مع قِلِّة حِيلتي شوَّقتِينى
للكحك وعمله قُدَّام عيني
حاضر ياسِت الكُل حاجِيب
رغم الجِيب ... انضَف م الصِّيني
أ. صفاء
يفرجها عليك .. المولى
دي عيالك منتظرين
ياسمين وحنين وأماني
بفرحهم ليك داعمين
د. سمير
دول عيوني اللي بشوف بيها
لو عازوا ألبان العُـصفَر أَأْوِيها
واحلبْها نهارِي وليلُه بغِبْـطَـه
والقِشْطَـه ... عَــايْمه فوقيها
أ. صفاء
تسلم ليهم .. ويقويك
على طلباتهم والتعزيز
وتعلمهم وتقويهم وتربيهم
نشأة تكون يرضاها عزيز
د. سمير
يِتقَبَّل مِـنِّي ومنِّك مولانا
ويْبـارك فى أولادنـا وإيَّانا
ويْعدِّى بِـينا الشَّـهر وسَنتُه
بكرمُه ... والخِير كلُّه ويَّانا
أ. صفاء
يكرم أصلك .. ويخليك
دايما فاتح لينا البيت
وتعززنا وتملا.. حياتنا
وتخلينا بعزوة وصيت
***
🤣د. سمير خليل
أ. صفاء الخواجة 🤣
تعليقات
إرسال تعليق