.. مع نفسي .. كلمات الشاعر أ. حسن السحماوي

مع نفسي

........................

شكل المربع .. فيه ضلع مال ..

أشبه بشبه المنحرف ... ..

وساعتها بس .. حسيت بإني ... المختلف

وصبحت أنا ... أحوالي حال .!

حسيت بإن الدايرة ممكن تتقسم .. بالإحتواء

والشكل ..باين فى الإيحاء .. والإلتواء

من كل ضلع بينحني .. أنا كنت فيه ..

بزاوية قايمة فى حدود المسألة ..

وشكل واضح فى أصول الملزمة ..

حتى الألف كان .... مختلف ...

فوق منو همزة تهزني ..

وبفعل ماض من زمن

.مابقاش تمام

الهمزة صبحت تنحني .

فى المستتر تقديره ( أنا )

وبقيت أنا .. أول حروف المبتدأ

الحال صبح ..

هو اللي باقي فى الضمير المختبيء ..

وبَخاف كتير .. أصبح .. خبر ..

فى المختبر ..

أنا كنت عمري .. مستقيم . .

فارد بطولي سكتي

مليش فى افعال اللئيم

واطوي حدودي فى دنيتي

دلوقت .. أنا .. مابقتش أنا ..

وبفعل فاعل .. مفتعل ..

فى جملة ناقصه ماتكتمل .. .

.اعرابها تايه من زمن ..

الحال ..صبح .. جواه ... محال

ومعاه ضمير .. بيحركه

فى الأفتعال ..!

والجملة صبحت فى الضياع ..

ممنوعة من صرف اللغة ..

وأنا لسه بيجروني .. وبكسرة ألم ..

لما استباح حق الكلام ..

خوفني زمني م القلم ..

فَضلت أعيش جوه السكون ..

أفضل ما اعيش عمري

فى (ندم..) ..!

...فارس الكلمة والمعنى ........................... شعر ..

حسن السحماوى ..